सेवाच परमधर्म : दिव्यांग बांधवांची सेवा हे माझे भाग्य, त्यांचा आनंद हाच माझ्यासाठी सर्वात मोठा उपहार – आमदार विनोद अग्रवाल

गोंदिया, दि. 4 जून : गोंदिया विधानसभा मतदारसंघाचे लोकप्रिय आमदार विनोद अग्रवाल यांनी आपला 56 वा वाढदिवस सामाजिक बांधिलकी आणि सेवाभाव जपत दिव्यांग बांधवांना विविध सहाय्यक साहित्यांचे वितरण करून साजरा केला. फुलचूर येथील जलाराम लॉनमध्ये आयोजित भव्य कार्यक्रमात त्यांनी 56 दिव्यांग लाभार्थ्यांना बॅटरीवर चालणाऱ्या रिक्षा, 56 गरजू व्यक्तींना श्रवणयंत्रे तसेच व्हीलचेअर भेटस्वरूप देऊन त्यांच्या जीवनप्रवासाला अधिक सुलभ करण्याचा प्रयत्न केला.

जनसेवेसाठी ओळखले जाणारे आमदार विनोद अग्रवाल यांनी वाढदिवसाचा उत्सव साजरा करण्याऐवजी तो समाजसेवेचे माध्यम बनवत दिव्यांग बांधवांच्या चेहऱ्यावर आनंद फुलविण्याचे कार्य केले. या कार्यक्रमाला जिल्हाभरातील हजारो नागरिक, विविध सामाजिक संस्थांचे प्रतिनिधी, विविध राजकीय पक्षांचे पदाधिकारी तसेच समर्थक मोठ्या संख्येने उपस्थित होते.

यावेळी बोलताना आमदार विनोद अग्रवाल म्हणाले की, दिव्यांग बांधवांची मदत करणे हे त्यांच्यासाठी मोठे भाग्य आहे. ते म्हणाले, “आज दिव्यांग भाऊ-बहिणींना बॅटरी रिक्षा, श्रवणयंत्रे आणि व्हीलचेअर देताना त्यांच्या चेहऱ्यावर दिसणारा आनंद हाच माझ्यासाठी सर्वात मोठा वाढदिवसाचा उपहार आहे. समाजातील गरजू लोकांची सेवा करणे म्हणजे ईश्वरसेवाच असून, हे कार्य मी आयुष्यभर करत राहीन.”

कार्यक्रमातील एक विशेष उपक्रम म्हणजे रक्तदान शिबिर. आमदार अग्रवाल यांनी आपल्या समर्थकांना पुष्पगुच्छ किंवा भेटवस्तू आणण्याऐवजी रक्तदान करण्याचे आवाहन केले होते. त्यांच्या या आवाहनाला उत्स्फूर्त प्रतिसाद देत 56 मित्र व समर्थकांनी रक्तदान करून त्यांना वाढदिवसाच्या शुभेच्छा दिल्या. या शिबिराच्या यशस्वी आयोजनासाठी बाई गंगाबाई शासकीय जिल्हा रुग्णालयाच्या रक्तपेढीचे तसेच शासकीय वैद्यकीय महाविद्यालयाच्या पथकाचे विशेष सहकार्य लाभले.

याशिवाय, भारतीय जनता युवा मोर्चा, गोंदिया यांच्या वतीने आमदार विनोद अग्रवाल यांच्या 56 व्या वाढदिवसानिमित्त जिल्हाभरात 5600 वृक्ष लागवडीचा संकल्प करण्यात आला. युवामोर्चाच्या कार्यकर्त्यांनी विविध गावांमध्ये आणि सार्वजनिक ठिकाणी वृक्षारोपण करून पर्यावरण संवर्धनाचा संदेश दिला.

प्रखर उन्हाची तमा न बाळगता गोंदिया विधानसभा क्षेत्रासह जिल्हाभरातील हजारो नागरिक जलाराम लॉन येथे उपस्थित राहिले आणि आमदार विनोद अग्रवाल यांना वाढदिवसाच्या शुभेच्छा देत त्यांच्या उत्तम आरोग्य, दीर्घायुष्य आणि उज्ज्वल भवितव्यासाठी शुभेच्छा व्यक्त केल्या. संपूर्ण कार्यक्रमात समाजसेवा, पर्यावरण संरक्षण आणि जनकल्याणाची भावना प्रकर्षाने दिसून आली.